இயற்கை அனர்த்த தரவு வெளியீடு டிஜிட்டல் மயமாக்கம்
முதல் முறையாக இயற்கை அனர்த்த தரவு வெளியீடு தொடர்பான 'info -NDRSC' அனர்த்த தரவு அமைப்பு செவ்வாய்க்கிழமை (மார்ச் 24) கொழும்பில் உள்ள அனர்த்த முகாமைத்துவ நிலையத்தில் நிகழ்ந்த வைபவமொன்றில் பாதுகாப்பு பிரதி அமைச்சர் மேஜர் ஜெனரல் அருண ஜயசேகர (ஓய்வு) தலைமையில் ஆரம்பிக்கப்பட்டது. இது நாட்டில் இயற்கை அனர்த்தங்களால் பாதிக்கப்பட்ட குடும்பங்கள் மற்றும் சேதமடைந்த சொத்துக்கள் குறித்த புள்ளிவிவரத் தரவைச் சேகரித்து வெளியிடும் தற்போதைய வழக்கமான செயல்முறையை டிஜிட்டல் மயமாக்க உதவும்.
இந்த அமைப்பு மக்கள் தொகை கணக்கெடுப்பு மற்றும் புள்ளிவிவரத் திணைக்களத்தின் தேசிய புள்ளிவிவர மேம்பாட்டுத் திட்டத்திற்கு ஏற்ப, தரவு மற்றும் தகவல் தரப்படுத்தல் மற்றும் சரிபார்ப்பு முறைகளுக்கு ஏற்ப உருவாக்கப்பட்டுள்ளது, மேலும் இது அனைத்து கிராம அலுவலர் பிரிவு மட்டங்களிலும் அனர்த்த பாதிப்பு குறித்து தரவு உள்ளீட்டை எளிதாக்கும்.
இந்த நிகழ்வில் இயற்கை அனர்த்தங்கள் குறித்த விழிப்புணர்வை ஏற்படுத்தும், அனர்த்தங்கள் மற்றும் நிவாரண சேவைகள் குறித்த தகவல்களை வழங்கும் காலாண்டு அதிகாரப்பூர்வ செய்திமடலான, 'info-NDRSC' உம் இச்சந்தர்ப்பத்தில் வெளியிடப்பட்டது. Info - NDRSC தரவுத்தளம் 'Save the Children' யின் நிதி உதவி மற்றும் 'GIS Solutions (Pvt) Ltd’ இன் தொழில்நுட்ப உதவியுடன் உருவாக்கப்பட்டது என்பது குறிப்பிடத்தக்கது.
பாதுகாப்பு அமைச்சின் கீழ் இயங்கும் தேசிய அனர்த்த நிவாரண சேவைகள் மையத்திற்காக உருவாக்கப்பட்ட இப் புதிய தரவு அமைப்பு, 'சுத்தமான இலங்கை' தேசிய திட்டத்தை செயல்படுத்துவதிலும், அரசாங்கத்தால் வழங்கப்படும் பொது சேவைகளை டிஜிட்டல் மயமாக்குவதிலும் மற்றொரு படியாகும். தொடக்க விழாவில் பாதுகாப்பு பிரதி அமைச்சர் மேஜர் ஜெனரல் அருண ஜயசேகர (ஓய்வு), அனர்த்த நிவாரண மேலதிக செயலாளர், தலைமை நிதி அதிகாரி, பணிப்பாளர் நாயகம் (திட்டமிடல்), மக்கள் தொகை கணக்கெடுப்பு மற்றும் புள்ளிவிவரத் திணைக்களத்தின் பணிப்பாளர் நாயகம், தேசிய கட்டிட ஆராய்ச்சி நிறுவனத்தின் பணிப்பாளர் நாயகம், வானிலை ஆராய்ச்சி திணைக்களத்தின் பணிப்பாளர் நாயகம் மற்றும் நாடளாவ ரீதியில் உள்ள அனைத்து மாவட்ட மற்றும் பிரதேச செயலகங்களிலும் இணைக்கப்பட்டுள்ள 485 அனர்த்த நிவாரண சேவை அதிகாரிகள் ஆன்லைன் மூலம் இந்நிகழ்வில் இணைந்துக்கொண்டனர்.
