நேற்று காலை இடம்பெற்ற ஈரானிய போர்க்கப்பல் விபத்தில் காப்பாற்றப் பட்ட 32 பேர் உடனடியாக மேலதிக மருத்துவ சிகிச்சைகளுக்காக காலி, கராபிட்டிய போதனா மருத்துவமனையில் அனுமதிக்கப்பட்டனர்,
மேலும் விமானப்படை மற்றும் கடலோர பாதுகாப்புத் திணைக்களத்துடன் இணைந்து தேடுதல் மற்றும் மீட்பு நடவடிக்கைகள் சம்பவ இடத்தில் தொடரும் என்று இலங்கை கடற்படை ஊடகப் பேச்சாளர் கமாண்டர் புத்திக சம்பத் தெரிவித்தார்.
அரசாங்க தகவல் திணைக்களத்தில் நேற்று (04) நடைபெற்ற சிறப்பு ஊடகவியலாளர் சந்திப்பில் பங்கேற்றபோது அவர் இதனைத் தெரிவித்தார்.
விபத்து இலங்கை கடற்படையின் கடல் வலயத்திற்கு வெளியே நிகழ்ந்தது, ஆனால் இலங்கையின் தேடல் மற்றும் மீட்பு வலயத்திற்குள் நிகழ்ந்தது என்பதால், இலங்கை கடற்படை கடல்சார் மரபுகளின்படி செயல்பட வேண்டும் என்று அவர் சுட்டிக்காட்டினார். விபத்து நடந்ததாக செய்தி கிடைத்தவுடன் அவர்கள் உடனடியாக நடவடிக்கை எடுத்து தேடுதல் நடவடிக்கைகளைத் தொடங்கியதாகவும் அவர் குறிப்பிட்டார்.
விபத்து நடந்த பகுதியில் பலர் கண்டுபிடிக்கப்பட்டதாகவும், அவர்கள் கப்பலின் பணியாளர்கள் என்று சந்தேகிக்கப்படுவதாகவும் அவர் மேலும் தெரிவித்தார். அடுத்தடுத்த விசாரணைகள் மூலம் மட்டுமே இதை உறுதிப்படுத்த முடியும் என்று அவர் சுட்டிக்காட்டினார். நீர்மூழ்கிக் கப்பல் தாக்குதலால் போர்க்கப்பல் சேதமடைந்ததாக வெளியான தகவலை மறுப்பதாகவும், விபத்து நடந்த விதம் அடுத்தடுத்த விசாரணைகள் மூலம் தெரியவரும் என்றும் அவர் சுட்டிக்காட்டினார்.
