பொழுதுபோக்கிற்காக ஸ்மார்ட்போன்களைப் பயன்படுத்தும் பழக்கத்திற்கு அடிமையானவர்கள், படிப்படியாக நச்சுப் போதைப்பொருட்களைப் பயன்படுத்தும் பழக்கத்திற்கும் அடிமையாகி விடுகிறார்கள் என்றும், பெற்றோர்கள் தங்கள் பாடசாலை செல்லும் பிள்ளைகளுக்கு, குறிப்பாக ஸ்மார்ட்போன்களை ஒழுக்கத்துடன் பயன்படுத்துமாறு அறிவுறுத்த வேண்டும் என்றும் சிரேஷ்ட உளவியல் ஆலோசகரும் உளவியல் சிகிச்சையாளருமான வைத்தியர் சமிந்த வீரசிறிவர்தன தெரிவித்தார்.
நேற்று (22) “முழு நாடும் ஒன்றாக'” தேசிய செயற்பாட்டின் தலைமை அலுவலகம் மற்றும் ஊடக மையத்தில் நடைபெற்ற ஒரு விசேட ஊடகக் கலந்துரையாடலில் பங்கேற்றபோது அவர் இவ்வாறு குறிப்பிட்டார்.
மின்னணுத் திரைகளைத் தொடர்ந்து பயன்படுத்துவது, போதைப்பொருள் பயன்பாட்டின் போது இந்த இரசாயனம் வெளியாவதைப் போலவே, மனித மூளையில் டோபமைன் என்ற வேதிப்பொருளின் அசாதாரண வெளியீட்டை ஏற்படுத்துகிறது என்றும், இது மனித உடலுக்கு மிகவும் தீங்கு விளைவிக்கும் என்றும் அவர் சுட்டிக்காட்டினார்.
போதைப்பொருள் பயன்பாடு ஒருபோதும் இன்பத்தை அளிப்பதில்லை என்றும், அது ஒரு கட்டுக்கதை என்றும், இந்தக் கட்டுக்கதை போதைப்பொருள் கடத்தல் வலையமைப்பால் சமூகமயமாக்கப்பட்டுள்ளது என்றும் அவர் மேலும் வலியுறுத்தினார்.
ஒரு குடும்பத்தில் போதைக்கு அடிமையானவர்கள் இருந்தால், அது அக்குடும்பங்களில் உள்ள குழந்தைகளின் மனநிலையை நேரடியாகப் பாதிக்கிறது என்றும், பிற்காலத்தில் அக்குடும்பங்களின் குழந்தைகளும் அவ்வாறு செய்யத் தூண்டப்படுவார்கள் என்றும் அவர் சுட்டிக்காட்டினார்.
குழந்தைகளின் குழந்தைப் பருவத்தில் வளர்க்கப்படும் மனநிலைகள், அவர்கள் வயது வந்தவுடன் போதைப்பொருள் பழக்கத்திற்கு ஒரு உந்துதலை உருவாக்குகின்றன என்றும், மரபியல் காரணிகளாலும் தனிநபர்கள் போதைப்பொருள் பயன்பாட்டிற்கு ஈர்க்கப்படுகிறார்கள் என்றும், மேலும், தங்கள் பிள்ளைகளுக்கு வீட்டில் ஒரு நல்ல சூழலை உருவாக்கி, அவர்களுக்கு அன்பையும் அரவணைப்பையும் வழங்குவது பெற்றோரின் பொறுப்பாகும் என்றும் அவர் வலியுறுத்தினார்.
