அனர்த்த சூழ்நிலை காரணமாக நுவரெலியா பொது மருத்துவமனையில் எழுந்த ஏராளமான பிரச்சினைகளுக்கு அவசர தீர்வு..

கடந்த நாட்களில் நாட்டை பாதித்த திடீர் அனர்த்த சூழ்நிலையைத் தொடர்ந்து நுவரெலியா மாவட்ட பொது மருத்துவமனைக்கு மற்றும் அதன் ஊழியர்களுக்கு ஏற்பட்டுள்ள இடர்களை ஆராய்வதற்கும், அந்த இடர்களுக்கு உடனடி தீர்வுகளை வழங்குவதற்கும்,

சுகாதார மற்றும் வெகுஜன ஊடக அமைச்சின் செயலாளர் விசேட வைத்திய நிபுணர் அனில் ஜாசிங்க நேற்று (09) நுவரெலியா மாவட்ட பொது மருத்துவமனையை ஆய்வு செய்தார்.

அவதான நிலையில் உள்ள பழைய மருத்துவமனையின் மகப்பேற்று மற்றும் குழந்தை மருத்துவ பிரிவுகள், புற்றுநோய் மற்றும் பிற மருத்துவ பிரிவுகள் தொடர்பாகவும், வெள்ளம் மற்றும் நிலச்சரிவு காரணமாக சேதமடைந்து அவதான நிலையில் உள்ள 2, நான்கு மாடி கட்டிட வளாகங்கள் உட்பட விசேட வைத்திய, வைத்திய மற்றும் தாதிகள் தங்கியிருக்கும் 8 வதிவிடங்கள் குறித்தும், முழுமையாக அழிக்கப்பட்ட தங்குமிடங்கள் குறித்தும் செயலாளர் விசேட கவனம் செலுத்தினார்.

இந்த இடங்களை பார்வையிட்ட செயலாளர், அனைத்து சவாலான நிலைமைகளையும் நிர்வகிக்கவும், எதிர்கால நடவடிக்கைகளை திட்டமிட்ட முறையில் மேற்கொள்ளவும் மருத்துவமனை நிருவாக அதிகாரசபைக்கு தேவையான அறிவுறுத்தல்களை வழங்கினார்.

நுவரெலியா மருத்துவமனையில் நோயாளிகளின் உயிரைப் பாதுகாக்கவும், நீர் வழங்கல், போக்குவரத்து மற்றும் தொலைபேசி வசதிகள் சுமார் 4 நாட்கள் தடைபட்டிருந்த நிலையில், மாற்று முறைகளைப் பயன்படுத்தி நோயாளி சிகிச்சை சேவைகளை தொடர்ந்து வழங்கவும், அனர்த்தத்ததை எதிர்கொள்வதற்காக பணிப்பாளரும் மருத்துவமனையின் முழு ஊழியர்களும் மேற்கொண்ட முயற்சிகளுக்கு சுகாதார அமைச்சின் செயலாளர் நன்றி தெரிவித்தார்.

அனர்த்தத்தின் போது தங்குமிடங்களுக்கு ஏற்பட்ட சேதம் காரணமாக தங்கியிருந்த மருத்துவமனை ஊழியர்கள் எதிர்கொள்ளும் வீட்டுப் பிரச்சினைகளுக்கு உடனடி மாற்றுத் தீர்வுகளை வழங்க நடவடிக்கை எடுக்கப்படும் என்று செயலாளர் வலியுறுத்தினார்.

மருத்துவமனையின் அவசர நிதித் தேவைகளைப் பூர்த்தி செய்வதற்கான ஏற்பாடுகளை சுகாதார அமைச்சு வழங்கும் என்றும், உலக சுகாதார அமைப்பு ரூ. 53 மில்லியன் நிதி உதவியை வழங்கியுள்ளதாகவும் செயலாளர் மேலும் தெரிவித்தார்.

அனர்த்தத்தை தொடர்ந்து மருத்துவமனையின் விசேட வைத்திய நிபுணர்கள், ஏனைய வைத்தியர்கள் மற்றும் தாதியர் விடுதிகளில் தங்கியிருந்த ஊழியர்களை விடுதிகளில் இருந்து வெளியேற்ற நடவடிக்கை எடுக்கப்பட்டுள்ளதுடன், மருத்துவமனையின் தற்போதைய நிலைமையை பொறியியல் பீடம் மற்றும் சுகாதார அமைச்சின் பொறியியல் பிரிவு அதிகாரிகள் ஆய்வு செய்து வருகின்றனர்.