பதிவாளர் நாயகம் திணைக்களத்தின் சேவைகளை டிஜிட்டல் மயமாக்கும் ‘ஒரே பதிவு’ (One Registry) வேலைத்திட்டத்தின் கீழ், பிரதேச செயலகங்களில் பணியாற்றும் 100 பதிவாளர் அதிகாரிகளுக்கு புதிய கணனி உபகரணங்களை வழங்கும் விசேட நிகழ்வு நேற்று (07) பதிவாளர் நாயகம் திணைக்கள கேட்போர் கூடத்தில் நடைபெற்றது. பொதுநிர்வாக, மாகாண சபைகள் மற்றும் உள்ளூராட்சி அமைச்சர் பேராசிரியர் சந்தன அபேரத்ன மற்றும் பிரதி அமைச்சர் ருவன் சேனாரத்ன ஆகியோரின் தலைமையில் இந்நிகழ்வு நடைபெற்றது.
ஐக்கிய நாடுகள் அபிவிருத்தித் திட்டம் (UNDP) மற்றும் உலக சுகாதார நிறுவனம் (WHO) ஆகியவற்றால் வழங்கப்பட்ட இக்கணனி தொகுதிகள், பிரதேச செயலகங்களில் நிறுவப்பட்டுள்ள பதிவாளர் நாயகம் திணைக்கள பிரிவுகளின் பணிகளை மிகவும் வினைத்திறனாக்குவதற்காக அதிகாரிகளிடம் கையளிக்கப்பட்டன.
இங்கு உரையாற்றிய அமைச்சர் பேராசிரியர் சந்தன அபேரத்ன, நாம் எவ்வளவு முன்னேற்றம் அடைந்துள்ளதாகக் கூறினாலும், நாட்டில் முறையான பிறப்புச் சான்றிதழ் மற்றும் திருமணச் சான்றிதழ் இல்லாத பெருமளவிலான மக்கள் இன்னும் இருப்பதாகவும், அத்தகைய வசதிகள் குறைந்த சமூகத்தினருக்குத் தேவையான அடிப்படை ஆவணங்களை முறையாக வழங்குவதற்கான அவசியத்தை அரசாங்கம் இனங்கண்டுள்ளதாகவும் தெரிவித்தார்.
அமைச்சர் மேலும் தெரிவிக்கையில்: "பிறப்பு முதல் இறப்பு வரை உங்களது சேவை இந்நாட்டுப் பிரஜைகளுக்கு அவசியமானது. அரசாங்கத்தின் முக்கிய வேலைத்திட்டமான டிஜிட்டல் மயமாக்கல் செயன்முறையின் ஒரு முக்கிய அங்கமாக இந்த 'ஒரே பதிவு' (One Registry) திட்டத்தைக் குறிப்பிடலாம். அடையாள ரீதியாக 25 மாவட்டங்களைச் சேர்ந்த 25 நிறுவனங்களின் அதிகாரிகளுக்கு உபகரணங்கள் வழங்கப்பட்டாலும், ஏனைய அதிகாரிகளுக்கும் விரைவாக இவ்வசதிகளை வழங்க திட்டமிடப்பட்டுள்ளது. தொழில்நுட்பத்தின் ஊடாக சேவைகளை எளிதாகவும் வேகமாகவும் வழங்க முடியும். எனினும், இயந்திரங்கள் இருந்தும் பழைய முறையைப் போல வினைத்திறன் இல்லை என்ற ஒரு கருத்து மக்களிடையே நிலவுகிறது. எனவே, கைமுறை (Manual) மற்றும் டிஜிட்டல் காலங்களின் அனுபவமுள்ள அதிகாரிகள் என்ற ரீதியில், பழைய முறையின் சிறந்த அம்சங்களையும் உள்வாங்கி மிகவும் வினைத்திறனான சேவையை வழங்குவது எமது பொறுப்பாகும்."
"நாம் வரலாற்றைப் படைக்கும் ஒரு காலகட்டத்தில் வாழ்கிறோம். நாம் எதிர்கொண்ட கஷ்டங்களை எமது பிள்ளைகள் அனுபவிக்க இடமளிக்காது, அவர்களுக்காக ஒரு சிறந்த சமூகத்தை உருவாக்கும் பொறுப்பு எம்மிடம் உள்ளது. வழங்கப்பட்டுள்ள இவ்வசதிகளை ஒரு சிறந்த நாட்டை உருவாக்க அதிகபட்சமாகப் பயன்படுத்துங்கள்" என அமைச்சர் கேட்டுக்கொண்டார்.
அரசு சேவையில் மனப்பாங்கு மாற்றம் - பிரதி அமைச்சர் ருவன் சேனாரத்ன மாகாண சபைகள் மற்றும் உள்ளூராட்சி பிரதி அமைச்சர் ருவன் சேனாரத்ன உரையாற்றுகையில், டிஜிட்டல் மயமாக்கல், ‘சுத்தமான இலங்கை’ மற்றும் ‘பிரஜா சக்தி’ ஆகிய மூன்று முக்கிய தூண்களின் அடிப்படையில் அரசாங்கம் நாட்டை வழிநடத்துவதாக வலியுறுத்தினார். "இன்றைய சமூகத்தில் புதியவற்றுக்கும் பழையவற்றுக்கும் இடையில் ஒரு மோதல் நிலவுகிறது. புதிய மக்கள் ஆணையின் ஊடாக நவீனமயமாக்கப்பட்ட, மனப்பாங்கு ரீதியாக மாற்றமடைந்த ஒரு நிர்வாகத்தையே மக்கள் எதிர்பார்க்கின்றனர். இந்த உபகரணங்கள் மக்களின் வரிப்பணத்தில் வழங்கப்பட்ட தேசிய சொத்துக்கள் என்பதால், அவற்றை பாதுகாப்பாகப் பயன்படுத்தி 'வளமான நாடு - அழகான வாழ்க்கை' என்ற தேசிய இலக்கை அடைய ஒத்துழைப்பு வழங்குங்கள்" என பிரதி அமைச்சர் தெரிவித்தார்.
ஐக்கிய நாடுகள் அபிவிருத்தித் திட்டத்தின் (UNDP) வதிவிடப் பிரதிநிதி அசுசா குபோட்டா (Azusa Kubota) உரையாற்றுகையில், இவ்வுபகரணங்கள் வழங்கப்படுவது வெறும் பொருள் உதவி என்பதைத் தாண்டி டிஜிட்டல் மாற்றத்திற்கான ஒரு நிலையான அடியாகும் எனத் தெரிவித்தார். "வலுவான மற்றும் நன்கு இயங்கும் டிஜிட்டல் சிவில் பதிவு மற்றும் முக்கிய புள்ளிவிவர (CRVS) அமைப்பு நல்லாட்சிக்கு அடிப்படைத் தளமாகும். இது ஒவ்வொரு தனிநபரின் அடையாளத்தை உறுதிப்படுத்துவதுடன், கொள்கை முடிவுகளுக்குத் தேவையான நம்பகமான தரவுகளையும் வழங்குகிறது. இது வெறும் காகித வேலை மட்டுமல்ல, இலங்கையில் உள்ள ஒவ்வொரு உயிரினதும் கண்ணியத்தை உறுதிப்படுத்தும் செயலாகும்" என அவர் குறிப்பிட்டார்.
இந்நிகழ்வில் பதிவாளர் நாயகம் எஸ். ஜலதீபன், உலக சுகாதார நிறுவனத்தின் இலங்கைக்கான பிரதிநிதி டாக்டர் ராஜேஷ் பாண்டவ் (Dr. Rajesh Pandav), அமைச்சின் செயலாளர்கள், மேலதிக மாவட்ட பதிவாளர்கள் மற்றும் திணைக்கள அதிகாரிகள் கலந்துகொண்டனர்.
