பொத்துவில் ஆதார மருத்துவமனையில் ஒரு பில்லியன் ரூபாய் செலவில் கட்டப்பட்ட மூன்று மாடி அறுவை சிகிச்சை மற்றும் மருத்துவ வளாகக் கட்டிடம் பொதுமக்களுக்குத் திறக்கப்படவுள்ளது.

சீன அரசாங்கத்தின் உதவியுடன் தேர்ந்தெடுக்கப்பட்ட 13 மருத்துவமனைகளில் சுகாதார வசதிகளை மேம்படுத்தும் திட்டத்தின் கீழ் கிழக்கு மாகாணத்தில் உள்ள பொத்துவில் ஆதார மருத்துவமனையில் கட்டப்பட்ட மூன்று மாடி அறுவை சிகிச்சை மற்றும் மருத்துவ வளாகக் கட்டிடத்தை சுகாதார மற்றும் ஊடக அமைச்சர் டாக்டர் நளிந்த ஜயதிஸ்ஸ நேற்று (19) திறந்து வைத்தார்.

கிழக்கு மாகாண மக்களுக்கு உகந்த மற்றும் வினைத்திறனான சுகாதார சேவைகளை வழங்குவதற்காக சுகாதார மற்றும் ஊடக அமைச்சகம் பல சுகாதார மேம்பாட்டு திட்டங்களை செயல்படுத்தியுள்ளது. பொத்துவில் ஆதார மருத்துவமனையில் மூன்று மாடி அறுவை சிகிச்சை மற்றும் மருத்துவ வளாகக் கட்டிடத்தைத் திறந்து வைத்த பிறகு, அமைச்சர் அங்கு நிறுவப்பட்ட சிகிச்சை தொகுதிகளை பார்வையிட்டார். பின்னர் நடைபெற்ற விழாவில் உரையாற்றிய அமைச்சர், சீன அரசாங்கத்தின் உதவியுடன் 13 மருத்துவமனைகளை மேம்படுத்தும் திட்டத்தில் 12 மருத்துவமனைகளின் பணிகள் நிறைவடைந்துள்ளதாகவும், மருத்துவமனையின் கட்டுமானப் பணிகள் மட்டுமே முடிக்கப்படவில்லை என்றும் கூறினார். தற்போதைய சமூக-பொருளாதார நிலைமை மற்றும் சுற்றுலாதுறைக்கு ஏற்ப பொத்துவில் ஆதார மருத்துவமனையை மேம்படுத்த நடவடிக்கை எடுக்கப்படும் என்றும், உள்ளூர் மருத்துவ சேவைகள் மற்றும் சுற்றுலா சிகிச்சை சேவைத் துறைகளுக்கும் கவனம் செலுத்தப்படும் என்றும் அவர் கூறினார். கடந்த காலங்களில் ஆரம்பிக்கபட்ட மருத்துவமனை தொடர்பான திட்டங்களை குறிப்பிட்ட காலத்திற்குள் முடிக்காததால் அவற்றை முடிக்க அதிக அளவு பணம் செலவிட வேண்டியுள்ளது என்றும், நிறைவுசெய்யப்படாத மேலும் 12 திட்டங்கள் அடையாளம் காணப்பட்டுள்ளன என்றும், அந்த திட்டங்களை முடிக்க நிதி ஒதுக்கப்படும் என்றும் அமைச்சர் கூறினார்.
பொத்துவில் ஆதார மருத்துவமனையில் அமைக்கப்பட்டுள்ள இந்த மூன்று மாடி அறுவை சிகிச்சை மற்றும் மருத்துவ வளாகக் கட்டிடத்தின் கட்டுமானச் செலவு ஒரு பில்லியன் ரூபாவாகும், மேலும் உபகரணங்களுக்காக சுமார் 50 மில்லியன் ரூபாய் செலவிடப்பட்டுள்ளது. இந்த மூன்று மாடி அறுவை சிகிச்சை மற்றும் மருத்துவ வளாகக் கட்டிடம் வெளிநோயாளர் பிரிவு, , மருந்தகம் , அறுவை சிகிச்சை பிரிவு, அவசர சிகிச்சைப் பிரிவுகள் பிசியோதெரபி பிரிவு, இரத்த வங்கி மற்றும் 90 படுக்கைகள் மற்றும் பல சேவைகளைக் கொண்டுள்ளது.
சுகாதார மற்றும் வெகுஜன ஊடக அமைச்சர் டாக்டர் நளிந்த ஜயதிஸ்ஸவுக்கு நினைவுப் பரிசு வழங்கப்பட்டது, மேலும் மருத்துவமனையின் வளர்ச்சிக்காகப் பாடுபட்டவர்களுக்கு நினைவுப் பொருட்களும் வழங்கப்பட்டன. பேருவளை தர்கா வைத்தியசாலை, அளுத்கம வைத்தியசாலை, சம்மாந்துறை வைத்தியசாலை, ஏறாவூர், பொத்துவில், கராப்பிட்டிய, பொலன்னறுவை, பதவிய, வலஸ்முல்லை, கலவான, மஹியங்கனை, ரிக்கிலகஸ்கட ஆகிய வைத்தியசாலைகளை சீன அரசாங்கத்தின் உதவியுடன் அபிவிருத்தி செய்ய திட்டமிடப்பட்டது.