தீர்வுகள் வழங்கப்பட்ட போதிலும், பொதுமக்களுக்கு சிரமத்தை ஏற்படுத்தும் வகையில், ரயில் நிலைய பொறுப்பதிகாரிகள் (Station Masters) மேற்கொண்ட நியாயமற்ற வேலைநிறுத்தம் தொடர்பாக போக்குவரத்து, நெடுஞ்சாலைகள், துறைமுகங்கள் மற்றும் சிவில் விமான சேவைகள் அமைச்சு அறிக்கை வெளியிட்டுள்ளது.
(2025.05.16) ஸ்டேஷன் மாஸ்டர்கள் இரண்டு முக்கிய கோரிக்கைகளை அடிப்படையாகக் கொண்டு அதாவது, ஐந்து ஆண்டுகளுக்கு ஒருமுறை பதவி தர உயர்வுகளை வழங்குவதில் தாமதம், மற்றும் புதிய ஆட்சேர்ப்பு செயல்முறையை செயல்படுத்தாமை ஆகிய இரண்டு கோரிக்கைகளை முன்வைத்து நியாயமற்ற முறையில் உடனடி வேலைநிறுத்தத்தை செயல்படுத்த முடிவு செய்தனர்.
போக்குவரத்து, நெடுஞ்சாலைகள், துறைமுகங்கள் மற்றும் சிவில் விமான சேவைகள் அமைச்சு என்றவகையில் இந்த ஆண்டின் ஆரம்பத்தில் (2025.01.22) ரயில்வே துறையில் உள்ள வெற்றிடங்களை நிரப்புவதற்கான அமைச்சரவைப் பத்திரம் ஒன்றின் மூலம் 909 வெற்றிடங்களுக்கான அமைச்சரவை ஒப்புதலையும் வழங்கியுள்ளது. இதில் 106 நிலைய அதிபர்களும் உள்ளடங்குகின்றன.
பல மாதங்களுக்கு முன்னரே இந்த அனுமதி வழங்கப்பட்டிருந்தாலும், அவற்றை செயல்படுத்துவதில் உள்ள தாமதம் மற்றும் சிக்கலான சூழ்நிலைகள் குறித்து அமைச்சு, அமைச்சர்கள் மட்டத்தில் தலையிட்டு கலந்துரையாடல்களை மேற்கொண்டிருந்த போதிலும் திணைக்களத்தின் சில உப திணைக்களங்களுக்கு இடையே காணப்படும் திறனற்ற தன்மை காரணமாக இதுவரையிலும் எந்தவொரு புதிய ஆட்சேர்ப்புகளையும் செய்யத் தவறியுள்ளன.
அவ்வாறே ஐந்து ஆண்டுகளுக்கு ஒரு முறை பதவி தர உயர்வு வழங்குவது உள்ளிட்ட பல விடயங்கள் குறித்து தாபனப் பணிப்பாளர் நாயகம் பொருத்தமான பரிந்துரைகளை வெளியிட்டுள்ளார், அவை 2025.05.07 திகதி திணைக்களத்திற்கு கிடைக்கப்பெற்றுள்ளது. எதிர்வரும் வாரத்தில் பொது சேவைகள் ஆணைக்குழுவின் அனுமதிக்காக அவற்றையும் அனுப்பத் தயாராகி வருவதாக திணைக்களம் நேற்றைய தினமும் புகையிரத நிலைய அதிபர் சங்க ஊழியர்களிடம் தெரிவித்துள்ளது.
இந்தக் கோரிக்கைகள் அமைச்சு மட்டத்தில் தீர்க்கப்பட்டிருந்த போதிலும் அவற்றை செயல்படுத்தாமையின் பின்னணியில் திணைக்களத்தின் போதாமைகள் மற்றும் பிரச்சினைகளை கலந்துரையாடித் தீர்த்துக்கொள்வதற்குப் பதிலாக பொதுமக்களுக்கு இடையூறு விளைவிக்கும் வகையில் உடனடி தொழிற்சங்க நடவடிக்கைகளை செயல்படுத்துவது குறித்து அமைச்சு என்ற வகையில் நாம் எமது அதிருப்தியை தெரிவிக்கிறோம்.
புகையிரத திணைக்களத்தின் சில உப திணைக்களங்களின் செயல்திறன் குறைவாக இருந்த போதிலும் அமைச்சு என்ற வகையில் அனைத்திலும் தலையீட்டை மேற்கொண்டு தீர்வுகாண முயற்சித்து வரும் போதிலும், பொதுமக்களுக்கு அநியாயமாக தீங்கு விளைவிக்கும் வேலைநிறுத்தங்களைத் தொடங்குவதற்குப் பின்னால் வேறு ஏதேனும் நோக்கம் உள்ளதா என்பது சந்தேகமே, மேலும் இந்த வேலைநிறுத்தமானது தெளிவாக அரசாங்கத்தை சிரமத்திற்கு உட்படுத்தவும் பொதுமக்களுக்கு தீங்கு விளைவிக்கவும் மட்டுமே மேற்கொள்ளப்படும் ஓர் முயற்சியாகத் தெரிகிறது. அத்துடன் புகையிரத சேவையைப் பராமரிக்க அமைச்சும், அரசாங்கமும் எல்லா வகையிலும் அனைத்து நடவடிக்கைகளையும் தயங்காது மேற்கொள்ளும் என்பதையும் நாங்கள் வலியுறுத்துகிறோம்.
