தெற்காசியாவின் டிஜிட்டல் எதிர்காலத்தை வடிவமைப்பதற்கான 'டிஜிட்டல் பொது உள்கட்டமைப்பு' (DPI) மீதான சர்வதேச பட்டறை ஆரம்பம்
உலக வங்கியின் 'டிஜிட்டல் மற்றும் செயற்கை நுண்ணறிவு' (AI) குழுவினால் ஏற்பாடு செய்யப்பட்ட "பிராந்திய டிஜிட்டல் சேவைகள் மற்றும் டிஜிட்டல் பொது உள்கட்டமைப்பு (DPI)" குறித்த மூன்று நாள் சர்வதேச பட்டறை, 2026 ஜூன் 10 அன்று கொழும்பில் வெற்றிகரமாக ஆரம்பமானது. இலங்கை அரசாங்கம் மற்றும் டிஜிட்டல் பொருளாதார அமைச்சினால் நடாத்தப்பட்ட இந்நிகழ்வில், டிஜிட்டல் பொருளாதார அமைச்சின் கௌரவ பிரதி அமைச்சர், பொறியியலாளர் எரங்க வீரரத்ன முக்கிய உரையற்றினார்.
இந்த உயர்மட்ட பிராந்திய மாநாட்டில் சர்வதேச நிபுணர்கள் மற்றும் வங்காளதேசம், பூட்டான், இந்தியா, மாலைத்தீவு, நேபாளம் மற்றும் இலங்கை ஆகிய ஆறு தெற்காசிய நாடுகளைச் சேர்ந்த உத்தியோகபூர்வ பிரதிநிதிகள் கலந்து கொண்டனர். அயர்லாந்தின் டிஜிட்டல் ஆட்சி கட்டமைப்பின் முன்னோடியான திரு. பெர்ரி லோவ்ரி (Mr. Barry Lowry) மற்றும் மால்டோவாவின் டிஜிட்டல் உருமாற்ற மூலோபாயத்தை வழிநடத்திய திரு. யூரி டர்கானு (Mr. Iurie Turcanu) உள்ளிட்ட குறிப்பிடத்தக்க உலகளாவிய நிபுணர்களும் இதில் கலந்துகொண்டனர்.
தனது முக்கிய உரையை ஆற்றிய பிரதி அமைச்சர் பொறியியலாளர் எரங்க வீரரத்ன, டிஜிட்டல் பொது உள்கட்டமைப்பு (DPI) என்பது வெறும் தனிமைப்படுத்தப்பட்ட தொழில்நுட்ப திட்டங்களின் தொகுப்பு அல்ல, மாறாக அது நல்லாட்சிக்கான ஒரு அடிப்படைத் தேவையாகும் என்று வலியுறுத்தினார். தொழில்நுட்பம் மனிதகுலத்திற்கு சேவை செய்ய வேண்டுமே தவிர, அது மனிதனை ஆதிக்கம் செலுத்தக் கூடாது என்ற இலங்கையின் முதன்மையான செயல்பாட்டுக் கொள்கையை அவர் மீண்டும் உறுதிப்படுத்தினார்.
இலங்கை தனது தேசிய டிஜிட்டல் அடையாளக் கட்டமைப்பு (Digital ID), நவீன டிஜிட்டல் கட்டண நுழைவாயில்கள் (payment gateways) மற்றும் நிறுவனங்களுக்கு இடையிலான தடையற்ற தரவுப் பரிமாற்ற தளங்களை தீவிரமாக உருவாக்கி வருவதாக இந்த அமர்வுகளின் போது சுட்டிக்காட்டப்பட்டது. இந்த ஒருங்கிணைந்த அமைப்புகள் முழுமையாகச் செயல்படுத்தப்பட்டதும், குடிமக்கள் மொபைல் சாதனங்கள் மூலம் நேரடியாகப் பாதுகாப்பான பொதுச் சேவைகளைப் பெற்றுக்கொள்ள முடியும்—இது வரிசைகளில் காத்திருத்தல், காகித வேலைகள் மற்றும் இடைத்தரகர் தாமதங்களை முற்றாக நீக்கும்.
பொதுவான சமூக-பொருளாதார சவால்களை முறியடிப்பதில் பிராந்திய அறிவுப் பகிர்வின் முக்கியத்துவத்தை எடுத்துரைத்த பிரதி அமைச்சர், இந்தியாவின் 'ஆதார்' (Aadhaar) மற்றும் 'யுபிஐ' (UPI) சுற்றுச்சூழல் அமைப்புகளுடன், அயர்லாந்து மற்றும் மால்டோவாவின் வெற்றிகரமான டிஜிட்டல் உருமாற்ற திட்ட வரைபடங்கள் இப்பிராந்தியத்திற்கு சிறந்த முன்மாதிரிகளாக விளங்குகின்றன என்று குறிப்பிட்டார்.
"தெற்காசியாவில் டிஜிட்டல் மாற்றம் என்பது ஒரு போட்டியல்ல; அது ஒரு கூட்டு முயற்சியாகும்," என்று குறிப்பிட்ட பிரதி அமைச்சர், பிராந்திய ஒத்துழைப்பிற்கான இலங்கையின் நீண்டகால அர்ப்பணிப்பை மீண்டும் வலியுறுத்தினார். இந்த மூன்று நாள் மூலோபாய பட்டறையின் முடிவுகள் கொழும்பைத் தாண்டி, ஒட்டுமொத்த தெற்காசிய பிராந்தியத்திலும் ஒரு நிலையான நேர்மறையான தாக்கத்தை ஏற்படுத்தும் என்றும் அவர் நம்பிக்கை வெளியிட்டார்.
