பெலாரஸ் குடியரசின் வெளியுறவு அமைச்சர் திரு. மாக்சிம் ரைபெனகோவ் அவர்களின் அழைப்பின் பேரில், வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலா அமைச்சர் விஜித ஹேரத் அவர்கள் இன்று (12) முதல் 15 வரை பெலாரஸுக்கு உத்தியோகபூர்வ பயணம் மேற்கொள்வார் என அமைச்சு அறிவித்துள்ளது.
கடந்த ஆண்டு இரு நாடுகளுக்கும் இடையே தூதரக உறவுகள் நிறுவப்பட்டதன் 25வது ஆண்டு விழாக் கொண்டாட்டத்திற்குப் பிறகு மேற்கொள்ளப்படும் இந்தப் பயணம், இலங்கைக்கும் பெலாரஸுக்கும் இடையிலான இருதரப்பு உறவுகளை வலுப்படுத்துவதற்கான ஒரு முக்கிய நிகழ்வாகக் கருதப்படுகிறது.
மின்ஸ்கில், அமைச்சர் அவர்கள் ஜனாதிபதி அலெக்சாண்டர் லுகாஷென்கோவைச் சந்திப்பார் மற்றும் பெலாரஸ் வெளியுறவு அமைச்சருடன் இருதரப்புப் பேச்சுவார்த்தை நடத்துவார் எனத் திட்டமிடப்பட்டுள்ளது.
பெலாரஸின் கல்வி மற்றும் சுகாதார அமைச்சர்களுடனும் கலந்துரையாடல்கள் நடத்தப்படும், மேலும் இரு நாடுகளுக்கும் இடையே பல்வேறு துறைகளில் பல புரிந்துணர்வு ஒப்பந்தங்களும் உடன்படிக்கைகளும் கையெழுத்திடப்படும் என எதிர்பார்க்கப்படுகிறது.
இந்தப் பயணத்தின் போது, பெலாரஸ் தேசிய ஏற்றுமதி மத்திய நிலையம் ஏற்பாடு செய்துள்ள வணிகம் மற்றும் சுற்றுலா வட்டமேசை கூட்டத்தில் அமைச்சர் விஜயத ஹெரத் உரையாற்றுவார் எனவும் திட்டமிடப்பட்டுள்ளது.
மேலும், பெலாரஸில் கல்வி பயிலும் இலங்கை மாணவர்களைச் சந்திக்கவும் அமைச்சர் திட்டமிட்டுள்ளார்.
